[ندعوك للتسجيل في المنتدى أو التعريف بنفسك لمعاينة هذه الصورة]امتى ابدا اكل طفلى؟
اقولك ان لبن الام فيه كل المكونات الغذائيه اللى بيحتاجها طفلك اول 6 شهور
بشرط انه يكون بكميه كافيه و طفلك بيزيد زياده مناسبه لو مش كده يبقى نبدا عند 4 شهور لكن مش قبل كده
طب ليه مش قبل كده ؟
عشان انتى كده بتبقى بتقلى فرصه طفلك من الاستفاده من اللبن الى هو اهم شىء بالنسباله فى الوقت ده
و كمان لما بتدخلى اكل بدرى بيقل لبنك بدرى
انتى كده كمان بتقلى فرصه طفلك من الاستفاده من الاجسام المناعيه فى اللبن
و كمان انتى بتعرضى طفلك للاسهال و حساسيه الاكل لان امعاءه لسه منضجتش
طيب ليه بندخل اكل مع اللبن بعد 4 او 6 شهور؟
1: لان الطفل مش هيقدر ياخد اكتر من لتر لبن فى اليوم اوكى
طيب ما هو وزنه بيزيد و احتياجه للطاقه بيزيد معاه هنا يجى بقى دور الاكل
2: لان الطفل كل ميكبر احتياجه للمعادن و الفيتامينات بيكبر و دا مش بيحققه اللبن وحده
3:عشان نعلم الطفل مهاره المضغ و البلع و استخدام المعلقه
4:عشان نعود جهازة الهضمى انه يهضم الاكل الصلب
طيب ابدا ازاى؟
بصى دى بعض النصايح اللى هتساعدك
فى الاول هتبداى تدى وجبه واحده بس فى اليوم
لو اكلتى الطفل بالملعقه و لقيتيه بيحاول رفضها و بيخرجها من بقه دا مش معناه انه مش حاب الاكل
هو بس مش متعود ع المعلقه حاولى معاه تانى و تالت
تدخلى نوع واحد لمده 3 ايام عشان تعرفى لو فى حساسيه
ابداى الاول بهدوء و بكميات قليله و بعدين زودى الكميه بالتدريج
و بعد كده دخلى نوع تانى
طيب ايه هيا اعراض الحساسيه من الاكل؟
الاسهال و الطفح الجلدى و التهاب منطقه الحفاض لو حصل اى حاجه من الاعراض دى و قفى الاكل فورا
اوعى تجبرى طفلك على اكل معين
ابداى الاول بالخضار و الحاجات اللى مش مسكرة و بعد كده دخلى الفاكهه عشان طفلك يتقبل الخضار
لو طفلك رفض نوع معين من الاكل حاولى معاه مرة واتنين لحد 10 مرات قبل متحكمى عليه انه مش بيحب الاكل ده
[ندعوك للتسجيل في المنتدى أو التعريف بنفسك لمعاينة هذه الصورة]نيجى بقى للسؤال المهم
ايه نوعيه الاكل اللى بدخلها؟
لو هنبدا من 4 شهور:
خضار مهروس: بطاطس –جزر –بطاطا-كوسه يسلق الخضار ثم يهرس جيدا
فاكهه: تفاح – كمثرى – موز- جوافه
عصاير: برتقال مخف – تفاح –جوافه
سيريلاك ارز
بعد 6 شهور:
سيريلاك قمح
هنزود كبد الطيور و صفار البيض و الجبنه المثلثات زبادى لايت
و هنزود عدد الوجبات ل 3 وجبات
بعد 7 شهور:
ممكن تبداى تدخلى صدور الفراخ
بشرط الطهى الجيد و تفرم جدا
بعد 8 شهور
نزود الاسماك و اللحم المفروم
[ندعوك للتسجيل في المنتدى أو التعريف بنفسك لمعاينة هذه الصورة]طيب ايه الممنوعات قبل سنه؟
الحليب البقرى: بيسبب حساسيه
العسل ممكن يكون فيه بكتيريا لا يتحملها الطفل
بياض البيض: يسبب الحساسيه
الملح الزياده فى الاكل : عشان بيسبب زياده ضغط الدم فى المستقبل
وطبعا البهارات و مكسبات الطعم واللون
بعد سنه من العمر تقدرى تدى لطفلك الاكل العادى اللى انتى بتاكلى منه
طيب عايزة افكار للوجبات؟
شوربىه الخضار :
قطعى البطاطس و الجزر و الكوسه و حطى عليهم ميه و ذرة ملح صغيرة جدا
و اضربيهم فى الخلاط مع الميه بتاعتهم و اديهوله بالبرونه
او من غير الميه و اديهوله بالمعلقه
الفواكه:
قشرى تفاح و انزعى منه البذور و اسلقيه
و نفس الكلام لو عايزاه عصير يبقى تضربيه بالميه بتاعته و لو جامد يبقى من غير الميه تهرسيه
ممكن تعملى معه كمثرى او موزة
صفار البيض:
اخلطيه مع الجبنه المثلثات
او مع بطاطس مسلوقه و مهروسه
كبده الفراخ:
ممكن تخلطيها مع الخضار
او مع شويه رز مهروسين كويس
او مع لسان العصفور و شوربه
[ندعوك للتسجيل في المنتدى أو التعريف بنفسك لمعاينة هذه الصورة]بانسبه للبيى فى الاول مش بياكل كتير انا كنت بعمل طريقه حلوة نفعتنى
كنت بسلق كميات من الخضار و الفاكهه و اهرسها و احطهم فى مكعبات التلج دى
و بكده ممكن تقعد معاكى لمده شهر
و كل مرة تطلعى مكعب او اتنين على قد مانتى عايزة
و اخيرا احب انصحك انك تبقى ذكيه و تحاولى تتحايلى على طفلك
يعنى مثلا محبش البطاطس لو حدها
دخليهاله مع حاجه تانيه بيحبها
و متياسيش حاولى اكتر من مرة
و اياكى تغصبيه ع الاكل
سيبيه هو يحدد المعاد اللى ياكل فيه و الكميه
قدميله الاكل فى اطباق ملونه و جذابه
[ندعوك للتسجيل في المنتدى أو التعريف بنفسك لمعاينة هذه الصورة] 
موضوع: طعام الطفل الرضيع 